Griaß eich, do is die Mitzi! Und i hob ah 2024 an guadn Grund, grantig zu sein. Des Joah is, wie i mit Schrecken feststöhn hob messn, a Schoitjoah. I hätt den zusätzlichen Tog Stress goaned braucht. Owa natürlich ist genau an dem Tog no a wichtiger Termin ongsetzt woan. Mit dem Hinweis, dass des natürlich besonders is. Ob da Termin söwa oda afoch nur es Datum waß i ned.
Des is owa noned ois. Schlimmer, ois dass i wahrscheinlich an Oawatstog in dem Joah mehr hob, san dejenigen, de Witze driwa mochn. Es ist ned lustig. I muas aufstehn, mi in die Öffis dränga und owoschn, mei Wäsch mocht si ned vo söwa, nur weil der Tog amoi in vier Joah passiert. Es is afoch a Fakt, den ma akzeptieren muas. Afoch damit obfindn. I mahn jo, dejenigen, de an dem Tog Geburtstog hom – eh oam. Is owa ned mei Problem. Besser olle vier Joah öda wean ois die Prozedur jedes Joah duachlaufn zu müssen. Do muas ma si wenigstens ned jedes Joah a neiches Geschenk iwaleng. Ma hod afoch vier Joah Zeit! A schlechta Scherz, Julia. Und no nie keat.
Na, i was eh wie des rennt. Fühlt si jo eh jeder dazu verpflichtet, über des Kuriosum aufzuklären. So ganz hob i des owa ned verstanden, muas i jo ah ned. Wos i wirklich super finden würd: wenn des a Feiatog warat! Weil no seltener geht’s jo eigentlich ned. Des kannt ma gern amoi in die Diskussion aufnehma. Najo, solong die Gschäfta offn hom und ned olle wieder vor lauter Panik hamstern, kann ma des ah egal sein. Versteh i sowieso ned: wer Hod ned zur Not drei Kilo Nudeln und fünf Dosn Paradeis daham? Is immerhin mei Ansa-Menü, wenns Moi wieder schnö gehn muas. Also imma dann, wenn i ah sonst ned was, wos i kochn sui.
Kumma zruck zum eigentlichen Grund für mein Grant: des Schoitjoa. I büd ma ein, dass des irgendwo amoi obschoffn wuitn. Oda woa des goa die Zeitumstellung? De vasteh i jo ah ned. Und jedes Moi fühl i mi, ois hätt i an Jet-Lag vo der an deppadn Stund viare oder zruck. Merken dua i mas ah ned. Mei Handy mocht des eh automatisch. Im Auto is dann nur immer a Herzinfarkt – stimmt die Uhr? Bin i so fruah dran oder unverschämt spät dran? Najo wuascht. Dea Tog reißt mi nur tiefer in Grant. Wenigstens howi wos zum Aufregen. Kann ma ah ned jeden Tog song. Obwohl, eigentlich schon. Schließlich bin i afoch gern grantig. Und des kann i heia afoch an Tog mehr sei.