Nebelschwaden hängen über Ostösterreich. Da Tau druckt die Blattl von die Bam owe und losst’s laungsam zu Boden sinken. Ois is noss, ois verfärbt si, ois stirbt. Es is Herbst und mir is koid. Griaß eich, i bin’s wieder. Die grantige Mitzi! Wos bin i heit wieder grantig und i sog eich a, warum. Draußen is grauslich und mir is schiach. Deshoib hob i mi im Netz schlaugmocht und eich die schensten und schiachsten Christkindlmärkte aussegsuacht. Oiso, ziagt’s eich woam au. Es geht los!
Warum san Burgenländerwitze so kurz? Damit de Wiener a mitkommen! Spaß beiseite. Wien is ned deppert… nur de Leut‘! Des is fia die Wiener Grantlerinnen und Grantler und olle, de ihren Glühwein und Punsch in da Bundeshauptstadt genießen wuin, während’s im Wiener-Schmäh untergehen.
Christkindlmärkte in Wien
Richtig schen is da Weihnachtsmarkt Am Hof. Der hod seit 11. November auf und is ana vo die ersten, der Weihnachtsstimmung verbreiten sui. Glei daneben is da Altwiener Christkindlmarkt auf da Freyung. Beim Art Advent am Karlsplatz san olle am besten aufgehoben, de auf Kunst und Handgmochtes stehen. Duat kennt’s eich vuilaufen lossn und gleichzeitig so duan, ois wärt’s Kunstexpertinnen und -experten. Ohne schlechtes Gewissen. Garantiert! Wer si unter die Jugend und Studierende mischen wü, der schaut beim Weihnachtsdorf am Campus der Universität Wien vorbei. Und wer si zwischen Touristen an Glühwein einihauen wü, der überteuert is und no dazu in ana Menschenmasse getrunken werden muass, der geht am Wiener Christkindlmarkt am Rathausplatz. A Klassiker, wo ma garantiert kane Heizschwammerl braucht.
Wos sunst no so fia Christkindlmärkte in Wien gibt und wos duat angeboten wird, findet’s ihr genau do.
Christkindlmärkte im Burgenland
Jo, ihr hobt’s richtig gelesen. A im tiefsten Osten vo Österreich gibt’s Christkindlmärkte. Des is a super Gelegenheit dem städtischen Trubel zu entfliehen. Oiso, setzts eich in Zug oder ins Auto und foahts a Stickl Richtung Ungarn. Ihr werdet’s ned enttäuscht!
In da Landeshauptstadt Eisenstadt wird’s ab 25. November wieder an Christkindlmarkt in da Innenstadt geben. Der is richtig schen und duat gibt’s guade Ofenkartoffeln in olle Variationen. Wer scho vorm ersten Glühwein Geld ausgeben wü, der schaut ab 8. Dezember im Innenhof vom Schloss Esterházy vorbei. Duat deaf ma sei Börsel fürn Eintritt zücken und residiert anschließend auf am kleinen, owa feinen Adventmarkt. Mei persönliches Highlight olle Joah is owa die Ruster Adventmeile. Fixprogramm versteht sich. Des woas a scho. All zu vü woa übers burgenländische Christkindlmärkte ned herauszufinden. Wo si in der Adventszeit wos duat, wissen in Woaheit nur die Burgenländerinnen und Burgenländer sölba. Scusi!
Des kostet der gaunze Spaß
A die Betreiberinnen und Betreiber vo de Christkindlmärkte bleiben vor da Inflation ned verschont.
Für an Punsch am Spittelberg muass ma heuer fia an Orangen-Punsch 4,20 und für an Spezial-Punsch 7,50 Euro hinlegen. In Schönbrunn kostet des köstliche Heißgetränk heuer 4,50 stott 4 Euro. In de fünf Weihnachtsdörfer sans 4,90 fia an Orangen-Punsch und 7,50 Euro fia an Spezial. A da Glühwein ziagt ordentlich an. Stott rund 4 Euro werden heuer zwischen 4,20 und 5 Euro fällig. Ned grod günstig, owa notwendig. Weil die besinnliche Zeit und die Vorfreude aufs Weihnachtsfest brauch ma uns vo der goaschtigen Teuerung sicher ned vermiesen lossn, des sog i eich scho – in olla Freundschaft.
So, jetzt seid’s richtige Expertinnen und Experten, wos Christkindlmärkte betrifft. I hoff, ihr geht’s hin und hobt’s a Gaude. Oiso, bleibt’s g’sund und immer a bissl grantig!
Bussi, eure grantige Mitzi.