Griaß eich, i bin’s wieder! Die grantige Mitzi unmittlboa vor Advent. Und wie suits ondas sein: Vor die Feiatog geht ma wieda einiges auf’d Nervn. I bin owa sicha ned die Anzige.
„Advent, Advent. Ein Lichtlein brennt.“ Jo, i Siachs. I mahn wie kann ma des ned seng? Iwaroi Kerzn, Lichterketten und Lampaln. Grod so, dass ma ah im Finstan siacht, wie miad i bin. Und i hob ma docht, Energie is teia, jeda spoat wo’s nua geht. Eigentlich haßt’s jo, da Advent is a bsundas bsinnliche Zeit. Owa warum hom dann olle um mi herum mehr Stress ois untam Joah? Wenn ma mit „besinnlich“ mahnt, dass ma in da Stodt plötzlich zwischen hektischen Leit treibt. Oda wenn da an jeda Eckn da Gruch noch Glühwein, Lebkuchen oder wos was i in die Nosn treibt. Oda wennst da desmoi wirklich vorgnumman host, rechtzeitig mit de Geschenke zu beginnan und immer wieder Notizn zu mochn, wos wem gfoin kannt – und dann dawischts di koit wie a Schneesturm mit 70 km/h! Liaba so vü Packerl bestöhn, dass i in Postler eftas siag ois meine Oaweitskollegen.
Es nutzt nix, iagendwonn muas ah i do duach. Scho es oziang dauert ewig! Stiefl schnian, Haum suachn, Hondschuach ah, Schal schnö umma und in die Jackn einpockn. Ois unhantlich, owa es geht. Zumindest bis i in da Bim bin. Haß is, i bin so dick eipockt, dass i mi ned amoi auf den freien Plotz setzn kann. Warums ah die Heizung so hoch aufdrahn miassn? Endlich! Die Bim spuckt die Massn aus. „Auf die Seite! Zuerst de Leit auselossan, donn einsteign!“ – ois ob des scho jemois funktioniert hätt. Vor lauta Leit siach i die Einkaufsstroßn ned maoi mehr. Erst moi an Glühwein aufan Schock. Der is koid, teia und picksiaß. Pfui. Wo kumman übahabt de ganzn Leit hea? Gibts do wos gratis? Sche wads, des Biachl fia die Mama, den Wei fian Papa und dann no die Sockn fiad Oma – des summiert si. Heit is wirklich a Wechselbad. Draußen is koid, in die Gschäfta haß bis zum umfoin. Schiwtzn, frian, schwitzn, frian. Nochn dritten Zyklus brich i o – i kon nimma. Jetzt in die Bim? Na danke, i bestöh ma a Taxi. Des is mei Weihnachtsgeschenk an mi.
Daham leg I mi auf die Couch. Da George Michael dröhnt ausm Radio, gefolgt vom Rudolf. Schauma moi, wos si auf Social Media duat. Owa ah do: a anziger Christbam. Frustriert greif i zur Keksdosn. Guad, dass i letztes Joah a Partie eingfroan hob. A Vanillekipferl, zwa Vanillekipferl, a Punschkrapferl, zwa Punschkrapferl… Wo is des Licht jetzt, des laut schreit: Es reicht mit die Keks! Mir geht des ois aufn Keks. Und wenn ma scho bei Keks sein: Die Adventzeit hod ah guade Seitn – Linzeraugen, Nusskipferl und Rumkugeln beispielsweise.